ක්‍රිකට් සාදු

THE STORY

About the film

​සාමකාමී ශ්‍රී ලාංකේය ගම්මානයක් සහ කටුක නාගරික පරිසරයක් අතර දෝලනය වන, ක්‍රිකට් යනු හුදු ක්‍රීඩාවක් පමණක්ම නොවන වටපිටාවක 'ක්‍රිකට් සාදු' කතාව ගෙතෙන්නේ කුඩා පිරිමි ළමයෙකු වටා ය. දුප්පත්කම සහ වැඩිහිටියන්ගේ අසරණ තීරණ හමුවේ ඔහුගේ ජීවිතය අනපේක්ෂිත කඩඉමකට ළඟා වන මොහොතකදීම, ඔහු සතු සුවිශේෂී ක්‍රීඩා කුසලතාවය ලොවට හෙළි වෙයි. ළමා වියේ නිදහස අහිමි වී, සාමණේර හිමිනමක ලෙස සසුන්ගත වන මේ කුඩා දරුවා වත්පිළිවෙත්, විනය සහ විවිධ බලාපොරොත්තු වලින් පිරුණු ලෝකයකට කොටු වෙයි. එහිදී ඔහු තම ගිහි අනන්‍යතාවය සහ පැවිදි අනන්‍යතාවය වෙන් කර හඳුනාගැනීමට දරන්නේ දැඩි අරගලයකි. ​මේ අතර, ධර්මය, විනය සහ නිවැරදි දේ කිරීමේ අභියෝගය පිළිබඳව තවමත් අවබෝධයක් ලබමින් සිටින, නගරයෙන් පැමිණි නවක භික්ෂූන් වහන්සේ නමක්, ගමේ පන්සලේ සිටින මෙම කුඩා සාමණේර හිමියන්ගේ භාරකාරත්වය සඳහා යොමු කෙරේ. සිවුරට මුවා වී සිටින ඒ අහිංසක දරුවාගේ සැබෑ ස්වභාවය වටහා ගන්නා උන්වහන්සේගේ සිතේ ඇතිවන දයාව, තම පැවිදි දිවියට පවා පටහැනි විය හැකි නිහඬ මානුෂීය මෙහෙවරක් බවට පත්වෙයි. මේ දෙපළ වටා සිටින දෙමාපියන්, ගම්වාසීන් සහ සමාජයේ බලධාරීන් ආදරය, බිය, අභිමානය හෝ හුදු පැවැත්ම පදනම් කරගනිමින් කටයුතු කරන අතර, ඒ සෑම ක්‍රියාවක්ම දරුවාගේ අවිනිශ්චිත අනාගතය කෙරෙහි ප්‍රබල බලපෑමක් එල්ල කරයි. ​'ක්‍රිකට් සාදු' යනු ළමා විය, දෙමාපිය සෙනෙහස, හෘදය සාක්ෂිය සහ දක්ෂතාවය මත රැඳුණු සියුම් බලාපොරොත්තුව පිළිබඳ කියැවෙන සංවේදී මෙන්ම අතිශය ශ්‍රී ලාංකේය කතාපුවතකි. දරුවෙකුගේ සැඟවුණු හැකියාවන් මුළු ලෝකයටම විද්‍යමාන වන මොහොතක, ඔහුව ආරක්ෂා කළ යුතු සමාජය තුළින්ම එම කුසලතාවයන් අහිමි වී යාමේ අවදානමකට ඔහු ලක්වන්නේ කෙසේද යන්න මෙමගින් මනාව නිරූපණය කෙරේ.